CEBU CITY, Philippines — Aabot sa 305 sasakyang pandagat ang lalahok sa Fluvial Procession na idaraos sa Sabado, Enero 18, bilang bahagi ng selebrasyon ng ika-460 Fiesta Señor sa Cebu.
Base sa datos ng Philippine Coast Guard-Central Visayas (PCG-7), nagsimula ang pagpaparehistro ng mga sasakyang pandagat noong Disyembre 2, 2024, at inisyal na itinakda ang deadline sa Enero 6. Gayunpaman, pinalawig ito hanggang Enero 11 upang bigyan ng mas maraming pagkakataon ang mga gustong sumali.
Sa kabuuang bilang, mayroong 217 MBCA bangka, 25 MTUG vessel, 24 na pax/cargo vessel, 14 speedboat, 12 yate, apat na cargo vessel, apat na recreational boat, isang fast craft, at isang service boat na nakarehistro.
Ang Fluvial Procession ay isa sa mga pinakahihintay na aktibidad tuwing panahon ng Sinulog. Inilalarawan nito ang pagdating ng Sto. Niño sa Cebu noong 1521, nang ibigay ito ni Ferdinand Magellan bilang regalo kay Reyna Juana, asawa ni Rajah Humabon.
Sa loob ng humigit-kumulang dalawang oras, ang mga imahen ng Señor Sto. Niño at Our Lady of Guadalupe ay ilalagay sa isang galyon na maglalayag sa Mactan Channel, kasabay ang daan-daang bangkang puno ng mga deboto.
Ngayong taon, gagamitin bilang galyon ang bagong roll-on roll-off (RoRo) vessel ng Medallion Transport Inc., na pinangalanang M/V Sto. Niño, upang gawing mas makasaysayan at makulay ang prusisyon.
