Isang malaking hakbang tungo sa mas murang bayarin at mas matatag na supply ng kuryente ang isinusulong para sa mga miyembro-konsyumer ng South Cotabato II Electric Cooperative (SOCOTECO II) sa pamamagitan ng iminumungkahing pakikipagtulungan nito sa Ignite Power.
Sa tulong ng pondo mula sa kumpanyang pinamumunuan ni Enrique K. Razon Jr. at dating Senador Manny Pacquiao, layunin ng kasunduan na ibaba sa 5.5 porsyento ang system loss ng kooperatiba.
Pagsugpo sa Mahigit ₱40 Milyong Pagkalugi Buwan-Buwan
Sa kasalukuyan, dumaranas ang SOCOTECO II ng halos 14 porsyentong system loss. Dahil dito, tinatayang mahigit ₱40 milyon kada buwan ang nawawala sa kooperatiba dahil sa mga sirang linya at ilegal na koneksyon.
Ang target na 5.5 percent ay mas mababa kumpara sa standard caps ng Energy Regulatory Commission (ERC) na naglalaro sa 8.25 hanggang 12 porsyento. Kapag naibaba ang system loss, direct na mababawasan ang pinapasa at binabayarang singil sa mga bill ng kuryente.
Nakahati sa dalawang pangunahing uri ang nawawalang kuryente:
-
Technical Loss: Nawawalang enerhiya dahil sa mga lumang kagamitan, sirang linya, at sobrang init sa mga transformer.
-
Non-Technical Loss: Pagkawala dahil sa ilegal na tapping, mga sirang kontador, at pagkakamali sa pag-compute ng billing.
Pondong Mula sa Investor, Hindi Agad Mula sa Konsyumer
Siniguro ng Information Officer ng Ignite Power na si Jonathan Cabrera na hindi agad ipapasa sa mga tao ang gagastusin sa rehabilitasyon.
“Una muna naming gagamitin ang aming sariling pondo upang mapabuti ang serbisyo bago kami humingi ng permiso sa ERC para sa cost recovery,” giit ni Cabrera.
Mga Pangunahing Hakbang sa Five-Year Modernization Plan
Sa ilalim ng iminumungkahing limang taong plano, nakatutok ang joint venture sa mga sumusunod:
-
Pagpapalit ng Lumang Linya: Pagsasaayos ng grid infrastructure at paglalagay ng mga modernong transformer.
-
Mas Kakaunting Blackout: Pagpapatupad ng mga modernong sistema para agad matukoy at maayos ang mga dahilan ng brownout.
-
Smart Metering: Pag-upgrade sa mga meter upang mapigilan ang pagnanakaw ng kuryente at maayos ang sistema ng singilan.
Nakatakdang magdesisyon ang humigit-kumulang 200,000 na miyembro-konsyumer ng SOCOTECO II sa gaganaping plebisito ukol sa pag-apruba sa kasunduang ito.
