LAOAG CITY, Ilocos Norte— Ipinatanggal ni boksing legend at dating Senador Manny Pacquiao ang kanyang service driver matapos nitong tumakas mula sa mga awtoridad nang sitahin dahil sa hindi awtorisadong paggamit ng EDSA Busway.

“Hindi niyo makikita ‘yung taong ‘yan sa akin ngayon. Sabi ko, diyan ka na lang. ‘Wag ka na sumama sa amin,” sabi ni Pacquiao sa mga mamamahayag.

Sinabi rin ni Pacquiao na pinagsabihan niya ang kanyang chief of security matapos malaman ang insidente.

“Na-briefing ko na chief security ko na mali ‘yung ginawa nila at pinagalitan ko nang pinagalitan. Pinabalik ko nga agad at pinakuha ‘yung ticket dahil nakakahiya, bakit nila tinakasan,” aniya.

Binigyang-diin niya na hindi niya kinukunsinti ang ganitong gawain, at sinabing, “Bawal sa akin ‘yang ganyan.”

Naglabas din ng opisyal na paghingi ng paumanhin ang kampo ni Pacquiao kaugnay ng insidente.

Ayon sa Department of Transportation’s Special Action and Intelligence Committee for Transportation (SAICT), dalawang sasakyan ang nahuli noong weekend na dumaan sa EDSA Busway, kung saan ang mga sakay nito ay nagpakilalang bahagi ng security detail ni Pacquiao.

Isa sa mga pasahero ang nagpakitang hihinto upang makipag-usap sa enforcer ngunit sa halip ay tumakas. Kalaunan ay bumalik din ang van, at binigyan ng traffic violation tickets ang convoy dahil sa hindi pagsunod sa traffic signs at ilegal na paggamit ng blinkers.